Sinopsis
Canto pode caber en moi pouco? Salamandra acredita como a creación artística, cando se penetra nos camiños da suxestión e o simbolismo, pode condensar nun breve lapso temporal toda unha ebulición de significados… abertos e indeterminados, ofrecidos por iso á imaxinación do receptor para que os complete. Fala da viaxe por excelencia, aquela que vincula o universo dos vivos co mundo dos mortos. Son varios os links desa travesía: a pomba que, nun plano fugaz, atravesa o ceo; a bolboreta, emblema de metamorfose, varias veces visualizada xunto a unha xanela; por suposto, o teléfono que permite a conexión, aínda que non se escoite ao interlocutor, co outro lado. Tamén o simbolismo elemental da auga (a ondada que unha e outra vez insiste sobre o areal) e, só insinuado, o do lume que connota o propio título: ambos parecen falar de transformación, de morte e resurrección.